Fazzo l’amor, xe vero
cossa ghe xe de mal?
volè che a quindise ani
stia là come un cocal?
Se tuto el santo giorno
sfadigo a lavorar,
xe giusto che la sera
me fazzo compagnar.
Fazzo, l’amor, xe vero,
no steme tormentar!

Vado a nudar, sicuro,
cossa ghe xe de mal?
co’ ’sto tantin de caldo
xe più che natural!
Go el vestitin setado
e se anche i vol guardar,
non son cussi malfata
de averme a vergognar!
Vado a nudar, sicuro,
no steme tormentar!

Vado, a balar, xe vero,
cossa ghe xe de mal?
saltar a l’età mia
no xe un pecà mortal!
Se gira e se se sburta
e se se fa strucar,
se torna a casa morte
e in piè no se pol star.
Vado a balar, xe vero,
no steme tormentar!

Vado su e zo pel Corso,
cossa ghe xe de mal?
go el moro che ‘l me speta
tacà soto el feral.
El xe una macia, el scherza,
no’l fa che stuzzigar;
no’l vol che ‘sti dedini
se strachi a lavorar.
Vado su e zo pel Corso,
no steme tormentar!

Vado al veglion, ‘sta sera,
cossa ghe xe de mal?
Son giovine, son bela
e semo in Carneval!
In maschera se ridi
a farli bazilar,
e a qualchedun la zena
se ghe a- poi a scrocar!
Vado al veglion, ‘sta sera,
no steme tormentar!

Son vecia e son in tochi:
questo ghe xe de mal!
Me tocarà, capisso,
finir a l’ospedal.
Purtropo, go finido
de farme cocolar,
E za che no i me guarda
me sfogo a tabacar!
Ma chi bazila mori,
no steme tormentar!